宁波咸贤闲

作者：马尚龙 

 来源：新民晚报“夜光杯”

沪语改写：边秦翌

沪语讲述：李     群

普通话讲述：风清扬

沪语审核、指导：丁迪蒙

咸搿种口味，是宁波人个招牌了。咸蟹、咸黄鱼、咸鲞鱼、虾酱、黄泥螺……所有个海鲜皆有得咸款。蔬菜里向，更是有咸菜咸当家个。咸菜遍布江南，必过讲到雪里蕻咸菜，勒勒宁波人个吃饭台子浪，伊最懂人情世故，荤腥素杂，侪配得上。幽默一点讲，雪里蕻可以去竞争宁波“市菜”个。

宁波人吃口咸，算是比较重口味个。必过大多数重口味个地方，侪是内地山区，勿是咸就是辣。宁波，应该排勿上个。

要是讲宁波个咸货勿咸，搿就是无知了；我是宁波人，当然晓得宁波咸。譬如，小辰光吃虾酱，大人会得关照，只好筷节头笃笃哦，一是虾酱贵，二是虾酱咸。

但是宁波也真个算勿上咸个。宁波人个饭桌浪，是咸个，也是鲜个，而且还是淡个，可以称作是咸淡错落有致，均衡有方。譬如咸菜大汤黄鱼，咸菜之咸，只是衬托了黄鱼个鲜。同样是咸菜开道，咸菜烤毛笋，勒勒宁波人个清淡序列中，一定名列前茅。

因为有得宁波亲眷，所以屋里常庄有咸蟹。每一趟亲眷送过来，总归是要提醒一句：咸蟹淡火火个，要趁早吃。“淡火火”是宁波闲话个一种美食标准，用火来修饰淡，有意思伐。至于咸鲞鱼，也叫作咸雷鱼，是真正个咸，平常辰光只是切个一小段，搭肉饼子一道蒸，还是咸，多吃也吃勿下去，可以叫做是“压饭榔头”了。

搿就是宁波个咸搭仔淡，当然咾，主旋律却还是咸。

宁波人欢喜咸，或许还可以讲，宁波人也好贤，好个是知书达理社会贤达之贤。有一趟到宁波状元楼去吃饭，作为一个宁波人，勒勒宁波人开个宁波饭店里吃宁波菜，交关写意（阿有惬意个意思）。吃饭是一种立体享受，菜搭仔乡音是奇妙个组合。曾经去过东北人开个宁波饭店，吃出来是二人转个尴尬。

搭普通个宁波饭店比起来，状元楼明显多了一点神圣，一踏进去像煞是自家也要去考状元一样。大堂里，宁波历史浪13位状元个画像高挂勒墙壁浪向，是励志，也是“海威”。宁波最后一位状元叫章鋆，是宁波府鄞县人。勒上海个宁波人当中，鄞县人邪气多。讲到此地，也请宁波鄞县人鼓鼓掌、点点赞了。

除脱咸搭淡个调和，宁波还邪气善于用甜来穿插穿插，对个，就是宁波汤团了。宁波人勒汤团高头下个功夫搭仔聪明，只有宁波人可以超过宁波人个。上海城隍庙有得一家“宁波汤团店”，交关超市搭仔小店卖汤团，侪必须打出宁波旗号个。

我勿晓得13位宁波状元是勿是欢喜吃咸货，想象当中应该侪欢喜自家家乡个口味伐。老底子叫吃口咸个人是“咸骆驼”，葛末13位状元就是13匹咸骆驼了。盐分是骆驼个能量，驼峰里是否也储存着贤？我没有探究过咸、贤之间个科学关系搭仔逻辑关系。

咸搭仔贤，作兴还应该再加上一个同音字：闲。“闲”勿是偷懒游手好闲个意思，江南沿海一带，有得交关勤劳致富之人，伊拉勒勒解决了温饱之后，会得用闲工夫闲心思去挖空心思提高生活质量。咸、贤搭仔闲，看上去好像风马牛，必过实际浪却是曲径通幽，还构成了保障生活富足个三角稳定关系。想想看，当咸足以咸淡错落之后，勿单单是利于保存搭仔省吃，也是生活个考究搭仔富足。富足而人闲，人闲而嘴刁，嘴刁而食美。富足也多了读书人，读书人齐巧是状元最底层个基础。更多个宁波读书人呒没成为状元，但是勒中国历史社会中叱咤风云，勒上海乃至勒海外，举足轻重。讲一口“石骨挺硬”宁波闲话个老宁波，老有可能，就是贤达之人。伊拉大多数是有得闲工夫个老吃客，最欢喜个，是宁波个咸。

近抢把听说东京奥运会中国夺金者中，有得4个人出自宁波，宁波人大为振奋。奥运冠军是世界级个贤达，是世界级个状元。我邪气想听伊拉讲讲啥个辰光想要压饭榔头，啥个辰光欢喜淡火火。

注：普通话诵读：风清扬

他是江浙人的后代，每天生活中说着标准普通话时，吴侬软语的滋养也从未忘记，于是乐意温习回味……

作者简介：

马尚龙

中国作家协会会员。上海人。1982年毕业于上海某大学中文专业，1983年起在上海作协资料室任馆员，1988年起先后在沪上知名的文学杂志刊物任编辑、副主编、总编助理、主编，副编审。2007年起任上海作协理事、散文报告文学创作委员会副主任。1983年开始发表作品。2008年加入中国作家协会。著有散文集《与名人同窗》、《明星的甜食》、《幽默应笑我》、《男人的缺点》、《女人的缺点》、《反调男女》，长篇文化纪实专著《上海女人》等文学作品。担任上海电视台等多家媒体的策划和嘉宾工作，很有影响力。

木棉，本名李群。医生。朗诵配音爱好者，上海市朗诵协会理事，中华诵读会、梅园文学社会员，梅园等多平台优秀主播。近年来多有朗诵（普通话、沪语）作品发表。愿“以带有灵魂温度的声音，表达富有生命力的文字”。